दि.१९
सुपे परिसरातील खैरेपडळ येथे एका २५ वर्षीय तरुण महिलेची निर्घृण हत्या करून तिचा मृतदेह विवस्त्र अवस्थेत रस्त्याशेजारी फेकून दिल्याची धक्कादायक घटना.
बारामतीच्या सुपा परिसरातून एक सुन्न करणारी बातमी समोर आली आहे. एका २५ ते २७ वर्षीय तरुण महिलेची अमानुष हत्या करून तिचा मृतदेह रस्त्याच्या कडेला फेकून दिल्याची घटना उघडकीस आली असून, या घटनेने संपूर्ण पुणे जिल्हा हादरला आहे. गुन्हेगारीच्या या भीषण कृत्याने परिसरात दहशतीचे वातावरण पसरले आहे.
पहाटेचा थरार अन् रक्ताने माखलेला मृतदेह
बारामती तालुक्यातील सुपे गावाजवळील काळखरेवाडी हद्दीतील खैरेपडळ परिसरात आज पहाटेच्या सुमारास ग्रामस्थांना एक धक्कादायक दृश्य दिसले. रस्त्याच्या कडेला एका तरुण महिलेचा रक्ताने माखलेला आणि विवस्त्र अवस्थेतील मृतदेह पडलेला होता. हे दृश्य पाहताच परिसरात एकच खळबळ उडाली. माहिती मिळताच सुपा पोलीस ठाण्याचे पथक घटनास्थळी धावून आले. प्राथमिक पाहणीत महिलेवर धारदार शस्त्राने अनेक वार करून तिची निर्घृण हत्या केल्याचे समोर आले आहे.
पुरावे मिटवण्याचा प्रयत्न?
नराधमाने हत्या केल्यानंतर ओळख पटू नये किंवा पुरावे नष्ट व्हावेत या उद्देशाने मृतदेह या निर्जन ठिकाणी फेकून दिल्याचे संशय व्यक्त केला जात आहे. महिलेच्या अंगावर झालेल्या जखमा पाहता, हा हल्ला अत्यंत अमानुष होता हे स्पष्ट होते. मृतदेहाच्या अवस्थेवरून संशयाची सुई अनेक बाजूंनी फिरत आहे. ही हत्या नेमकी कुठे झाली आणि इथे फक्त मृतदेह टाकला का, याचा शोध आता पोलीस घेत आहेत.
पाच पथके तैनात; तपासाची चक्रे वेगवान
घटनेचे गांभीर्य ओळखून अप्पर पोलीस अधीक्षक गणेश बिरादार यांनी तातडीने घटनास्थळाची पाहणी केली. तपासासाठी फॉरेन्सिक तज्ज्ञ आणि श्वानपथकाला पाचारण करण्यात आले आहे.
आरोपीच्या मुसक्या आवळण्यासाठी पोलिसांची पाच पथके विविध दिशांना रवाना करण्यात आली आहेत. परिसरातील सीसीटीव्ही फुटेज आणि तांत्रिक माहितीच्या आधारे पोलिसांनी संशयितांचा माग काढण्यास सुरुवात केली आहे.
सुपा पोलीस ठाण्यात खुनाचा गुन्हा दाखल करण्यात आला असून, सहाय्यक पोलीस निरीक्षक मनोज नवसरे यांच्या मार्गदर्शनाखाली पुढील तपास युद्धपातळीवर सुरू आहे. या निर्घृण खुनामागे नेमके काय कारण आहे? प्रेमप्रकरण, जुना वाद की आणखी काही? या प्रश्नांचे उत्तर आता पोलीस तपासातच समोर येईल.
